مارك زوكربيرج يعلن عن خدمة توثيق حساب الفيسبوك المدفوعة

في استخدامنا للفيسبوك بأستمرار اتعودنا نشوف حسابات موثقة أو جنبها "العلامة الزرقاء" واللي بتدل على إن صاحب الحساب دة شخص مشهور ودة حسابه الرسمي. ولكن اتفاجئنا كلنا يوم الأحد 19 فبراير 2023 بمنشور جديد من مارك زوكربيرج المدير التنفيذي لشركة ميتا المالكة للفيسبوك وكان المنشور بيقول:

"صباح الخير وإعلان منتج جديد: بدأنا هذا الأسبوع في طرح Meta Verified - خدمة اشتراك تتيح لك التحقق من حسابك باستخدام هوية حكومية، والحصول على شارة زرقاء، والحصول على حماية إضافية ضد انتحال الهوية ضد الحسابات التي تدعي أنك أنت، والحصول على وصول مباشر إلى دعم العملاء تتعلق هذه الميزة الجديدة بزيادة الموثوقية والأمان عبر خدماتنا، يبدأ Meta Verified من 11.99 دولارًا شهريًا على الويب أو 14.99 دولارًا شهريًا على iOS، سننطلق في أستراليا ونيوزيلندا هذا الأسبوع والمزيد من البلدان قريبًا"

ودة اللي أثار جدل كبير بين كتير من الناس ومستخدمين الفيسبوك. هل الخاصية الجديدة فعلًا معناها أمان زيادة لينا ولا هي مجرد طريقة لجمع فلوس أكتر وزيادة أرباح شركة ميتا؟ وزاد الجدل دة خاصًة بعد إعلان "إيلون ماسك" عن خاصية التوثيق المدفوعة في تويتر قبل أيام واللي سار على نهجها مارك. ولكن عشان تعرف تجاوب على السؤال دة خلينا نقولك تاريخ توثيق حساب الفيسبوك من البداية.

توثيق حساب الفيسبوك قبل 19 فبراير:

قبل إعلان مارك عن بيع توثيق حساب الفيسبوك، كان التوثيق حساب الفيسبوك خدمة مجانية بشكل كامل ومكانتش بتحتاج إلا تطابق الشروط وتقديم طلب توثيق حساب الفيسبوك مع المستندات اللازمة والانتظار بين 6 لـ 7 أيام. كان التوثيق حساب الفيسبوك أحيانًا بيتم بشكل تلقائي بدون طلب منك ودة لأن العاملين في فيسبوك أو شركة ميتا كانوا بيوثقوا الحسابات بشكل تلقائي لما يلاقوا انها فعلًا مهمة وتستاهل التوثيق دة.

أهمية توثيق حسابك الفيسبوك:

يمكن بعض الناس يشوفوا إن توثيق حساب الفيسبوك مش مهم ولكنه مفيد لأنه بيزود المصداقية وبيمنع التلاعب والشائعات ودة لأننا اتعودنا نشوف أكتر من حساب بإسم الأشخاص المشهورة وكل حساب منهم يقدر ينشر أي تصريحات من غير ما نعرف هل الشخصية الحقيقية قالت كدة فعلًا ولا لا وعشان كدة بدأ الفيسبوك يميل لفكرة توثيق الحسابات عشان يحافظ على المصداقية ويحد من المشاكل قدر المستطاع.

طريقة توثيق حساب الفيسبوك قبل 19 فبراير:

عشان تقدر تحصل على موافقة على طلب توثيق حساب الفيسبوك لازم يكون الحساب بتاعك مطابق لبعض المواصفات والشروط وهي:

• وجود صورة ملف شخصي
• وجود صورة غلاف
• إسم حساب متوافق مع شروط فيسبوك
• محتوى منشور على الحساب
• تفعيل "المتابعة"
• بطاقة هوية معتمدة من الحكومة في حال كان التوثيق لحساب شخصي، أو بطاقة ضريبية وسجل تجاري في حال كان التوثيق لصفحة شركة.

تكلفة توثيق حساب الفيسبوك:

توثيق حساب الفيسبوك كان مجاني بشكل كامل قبل إعلان مارك اللي اصدره يوم 19 فبراير وعلى الرغم من إن الفيسبوك أو شركة ميتا كانت بتقدمه بشكل مجاني تمامًا إلا إن كتير من الشركات كانت بتدعي شراءه ليك مقابل ما يتراوح من 1000 إلى 2000 دولار ولكن كانت شركة ميتا دايمًا بتؤكد إن دة مش صحيح وإن الأفضل تقديم طلب توثيق حساب الفيسبوك بالطريقة التقليدية وعدم الاندفاع ورا الشركات دي. أما حاليًا وبعد تصريح مارك فهتكون تكلفة توثيق حساب الفيسبوك هي 11.99 دولار شهريًا للأندرويد والويب و 14.99 دولار شهريًا لمستخدمين الـ IOS.

هل توثيق حساب الفيسبوك يمنع اختراق الحساب؟

توثيق حساب الفيسبوك مش هيقدر يحميك من محاولات الاختراق أو الـ hacking ولكنه هيقدر يساعدك بسهولة ترجع حسابك عن طريق التواصل مع الدعم الفني وإرسال ما يثبت ملكيتك للحساب زي بطاقة الهوية وغيرها من مستندات.

هل الحسابات الموثقة هتتأثر بالقرار الجديد؟

زي ما اتنشر على لسان مسؤولين من شركة ميتا، فالحسابات الموثقة بالفعل من قبل كدة مش هتتأثر بالقرار الجديد ولا هيحتاجوا يدفعوا الاشتراك اللي اعلن عنه مارك. ولكن هل دة هيدوم لفترة طويلة؟ دة اللي هنعرفه مع الوقت.

مخاوف الناس من توثيق حساب الفيسبوك الجديد:

رغم إن الموضوع يبدو أكتر أمان لمستخدمين الفيسبوك، إلا أن ناس كتير متخوفة من المكسب المادي اللي هيعود على شركة ميتا واللي ممكن يخلي التوثيق متاح لأي حد مش بس الأشخاص الحقيقية كونه سلعة تقدر تشتريها. ولكن دة بردو هنعرفه أكتر بعدين وبعد تنفيذ القرار لأن زي ما قال مارك ومتحدثين رسميين من شركة ميتا إن شروط توثيق حساب الفيسبوك بردو هتضمن إن الشخص يكون فوق الـ 18 سنة ويبعت بطاقة الهوية الخاصة به للفريق المختص عشان يقدر يحصل على التوثيق.